Gipahigayon ang Third Quarter Nationwide Simultaneous Earthquake Drill o NSED sa Zamboanga del Norte Police Provincial Office o ZNPPO sa Parade Ground, Camp Hamac, Sicayab, Dipolog City karung adlawa Setyembre 10, 2026. Misalmot sa maong kalihokan ang mga representante sa PDRRMO ug ang kapulisan ubos sa pagpangulo ni PCOL Reydante E. Ariza, Police Provincial Director sa ZNPPO.
Tumong sa maong earthquake drill nga masulayan ug mapalig-on ang kahibalo ug kaandam sa mga pulis sa hustong pagtubag panahon sa linog, lakip na ang pagpraktis sa “Duck, Cover, and Hold.” Gisulayan usab ang evacuation protocols, komunikasyon, koordinasyon ug kapasidad sa mga personahe sa pagresponde ug pagtabang sa mga posibleng maangol.
Atol sa kalihokan, gipahigayon usab ang tsunami drill isip dugang nga pagbansay sa pagtubag sa mga emerhensiya. Gipahinumdoman usab niini ang mga personahe nga seryosohon ang earthquake drill aron mapalambo ang kaandam ug malikayan ang daghang kaswalti kung moigo ang tinuod nga katalagman.
