Nakadawat og tulo ka prestihiyosong ganti ang Dakbayan sa Ormoc sa Component City Level sa Association of Tourism Officers of the Philippines (ATOP) Pearl Awards 2026 nga gipahigayon sa Ormoc City Sports Complex, Barangay Juaton, niadtong nakalabay nga adlaw.
Gipasiugdahan sa dakbayan ang Grand Winner nga pasidungog sa kategoryang Best Practices on Sustainable Tourism pinaagi sa entry nga “Sustainable Tourism: The Ormoc Way.” Giila niini ang mga inisyatibo sa lokal nga pangagamhanan sa pagpalambo sa sektor sa turismo, samtang gipreserbar ang natural nga mga atraksyon, lokal nga identidad ug kultura sa komunidad.
Nakab-ot usab sa Ormoc ang 1st Runner-up sa kategoryang Best Event Hosting (International) pinaagi sa pagpahigayon sa Joint Training Camp of the Philippine Modern Pentathlon Association and Kuwait Modern Pentathlon Federation, nga nagpalig-on sa pag-ila sa dakbayan isip usa ka nag-uswag nga destinasyon sa sports tourism.
Dugang pa, nakuha sa Ormoc ang 2nd Runner-up sa kategoryang Best Tourism Month/Event pinaagi sa entry nga “Ormoc: Our Responsible Movement for Outstanding Communities, Inclusive Celebration, Sustainable Transformation.”
Gidawat ang mga ganti sa mga opisyal sa dakbayan nga gipangulohan ni City Mayor Lucy Torres Gomez ug Congressman Richard Gomez. Ang maong kalampusan nagpakita sa padayong paningkamot sa lokal nga pangagamhanan sa pagpalambo sa turismo ug pagmugna og mga oportunidad alang sa inklusibo ug malungtarong kalamboan sa mga Ormocanon.
Nahimong mas halandumon ang seremonyas pinaagi sa mga espesyal nga pasundayag sa mga batikang mag-aawit nga sila Dulce ug Lani Misalucha.
Gipangunahan ang programa sa aktor ug komedyanteng si John “Sweet” Lapus, stand-up comedian nga si Alex Calleja, ug host ug Miss Philippines Earth 2025 nga si Joy Barcoma.
Photo courtesy: City Government of Ormoc
