Nadakpan sa mga personahe sa Ormoc City Police Station 6 (OCPS6) ang usa ka 63-anyos nga lalaki nga giila sa alyas “Nonoy”, residente sa Barangay Antipolo, Isabel, Leyte, atol sa operasyon sa Barangay Ipil, Ormoc City, pasado alas 4:39 sa hapon niadtong nakalabay nga adlaw.
Atol sa operasyon, gidakop ang suspek pinasikad sa warrant of arrest nga giisyu niadtong Agosto 31, 2017, tungod sa giingong paglapas sa Section 22(a), kalabot sa Section 28(e) sa Republic Act No. 1161 o Social Security Law, nga giusab pinaagi sa Republic Act No. 8282.
Ang maong balaod nagdumala sa Social Security System (SSS) ug sa mga obligasyon nga may kalabotan niini. Nagrekomendar ang korte og 24 mil pesos nga piyansa alang sa temporaryong kagawasan sa akusado.
Gipahibalo ang akusado sa iyang mga katungod ubos sa Miranda Doctrine gamit ang pinulongang iyang nasabtan. Gidala siya sa kostodiya sa kapulisan alang sa dokumentasyon ug hustong pagproseso sa kaso sa dili pa itugyan ngadto sa korte nga nag-isyu sa warrant of arrest.
