Gidala sa tambalanan ang usa ka 35 anyos nga lalaki human kini gidunggab sa usa ka 45 anyos nga suspetsado sa Purok Lilang, Barangay Poblacion, Sominot, Zamboanga del Sur, niadtong nakalabay nga adlaw. Base sa inisyal nga imbestigasyon, nahitabo ang insidente sa pinuy-anan sa biktima atol sa pagsaulog sa bisperas isip pagpangandam sa umaabot nga kapistahan sa lungsod.
Apan nagkalalisay ang biktima ug ang igsoon sa suspetsado nga mas nisamot pa ang panaglalis gumikan sa epekto sa ilang nainom nga makahubog nga ilimnon.
Atol sa panaglalis, giingong mikuha og kutsilyo sa kusina ang suspetsado ug gidunggab ang biktima sa nagkalainlaing bahin sa lawas. Gidala dayon ang biktima sa Sominot Rural Health Unit alang sa medikal nga pag-atiman, samtang nadakpan usab sa mga niresponde nga kapulisan ang suspetsado.
Sa pagkakaron, anaa na sa kustodiya sa Sominot Municipal Police Station ang suspetsado alang sa tukmang disposisyon.
Photo courtesy:PIO ZSPPO
