Nanguna si Presidente Ferdinand Marcos Jr. sa pormal nga pag-abli sa Tugbong Solar Pump Irrigation Project sa Kananga, Leyte kagahapong adlawa, Oktubre 23, 2026, nga nagtumong sa pagpalambo sa sistema sa irigasyon ug pagtabang sa mga mag-uuma sa maong lugar.
Ang proyekto sa National Irrigation Administration (NIA), nga nagkantidad og ₱91.5 milyon, maghatag og suplay sa tubig alang sa 115 ka ektarya nga umahan sa Barangay Tugbong ug Barangay Sto. Niño. Mokabat sa 66 ka mag-uuma nga sakop sa asosasyon sa mga mag-uuma sa maong mga barangay ang gilauman nga makabenepisyo niini.
Pinaagi sa paggamit sa enerhiya sa adlaw aron mapaandar ang mga bomba sa tubig, gilauman nga maminusan ang gasto sa gasolina ug masiguro ang padayon nga irigasyon sa mga umahan sa tibuok tuig.
Gilauman usab nga mosaka ang abot sa mga pananom ug kita sa mga mag-uuma, samtang makatampo sa pagpalig-on sa suplay sa pagkaon sa Eastern Visayas ilabina sa pag-atubang sa posibleng epekto sa Super El Niño.
Photo courtesy: PIA Leyte
