Gipasiugda sa Cooperative Development Authority (CDA) 9 nga usa sa mga hagit nga ilang giatubang mao ang kadaghan sa mga micro, small, and medium enterprises (MSME) nga naglangkob sa halos 90 porsyento sa mga kooperatiba sa Rehiyon 9.
Matud ni CDA 9 Regional Director Ruben Cunanan, sa 550 nga mga na kategorya isip aktibong kooperatiba, halos 90 porsyento niini mga Micro Small and Medium Enterprises (MSMEs) nga nagkinahanglan ug dugang pagtagad sa ilang buhatan.
Segun niya, nagpakita kini sa dakong papel sa MSMEs sulod sa sektor sa kooperatiba, hinungdan nga importante ang padayong pagpalig-on sa ilang kapasidad ug pagdumala. Tungod niini, gikinahanglan ang tukmang giya ug suporta aron mas mapalambo ang operasyon sa mga kooperatiba ug matabangan ang mga miyembro niini nga mapadayon ang ilang panginabuhian.
Gilauman nga pinaagi sa padayong pagtabang ug pagpalambo sa sektor, mas mapalig-on ang kontribusyon sa mga kooperatiba sa pag-uswag sa ekonomiya sa tibuok Zamboanga Peninsula.
