Nagpatigayon ang City Government sang Tacurong sang training sa Edible Landscaping para sa mga kabataan nga halin sa nagkalain-lain nga lugar sang Region 12 kag Bangsamoro Autonomous Region in Muslim Mindanao ukon BARMM, halin Oktubre 20 tubtob 22, 2026.
Ginpatigayon ang paghanas sa Urban Agriculture Demonstration Farm sang siyudad, kun sa diin gintudluan ang mga partisipante sang praktikal nga pamaagi sa pagpatubo sang mga tanom nga mahimo makahatag sang presko kag masustansya nga pagkaon, bisan sa limitado nga espasyo.
Pinaagi sa sini nga inisyatibo, ginatinguhaan nga mapauswag ang kaalam kag kahanas sang mga kabatan-onan sa agrikultura, samtang ginapabaskog ang seguridad sa pagkaon, pag-atipan sa palibot kag pagkamapinadayunon sang mga komunidad.
Ginalauman nga paagi sa kaangay nga mga programa, mas madamo nga kabataan ang mangin interesado sa agrikultura kag makabulig sa pagpatunhay sang mas masarangan kag masaligan nga suplay sang pagkaon sa ila tagsa ka komunidad.
Photo courtesy: City Government of Tacurong
