Usa ka 50-anyos nga buta nga lalaki sa England ang gisentensiyahan og pagkabilanggo human siya nagmaneho og gibana-bana nga 240 ka kilometro samtang hubog. Giila ang lalaki nga si Anthony Hall gikan sa Huddersfield. Gidakop siya sa kapulisan human namatikdan nga nag-weaving ang iyang sakyanan nga Vauxhall Meriva taliwala sa mga lane sa dalan.
Sumala sa korte, gikuha ni Hall ang sakyanan sa iyang kapikas nga walay pagtugot. Miangkon siya nga nakainom siya og alkohol. Giingnan ni Hall ang kapulisan nga duha na ka tuig siyang buta apan makakita pa gihapon og kahayag. Samtang anaa sa motorway, nagsunod lang siya sa mga suga sa usa ka dakong trak aron makagiya sa iyang agianan.
Nakadagan siya og kinatibuk-ang distansya nga 240 ka kilometro sa wala pa siya gipahunong sa mga awtoridad; gikatahong plano niya nga mopadayon hangtod sa Scotland. Ang distansya nga 240 ka kilometro susama sa biyahe gikan sa Cubao paingon sa Baguio City.
Nagkanayon si Hall nga gusto niyang mobiya sa ilang balay tungod sa mga problema sa relasyon, pinansyal nga kalisdanan, ug uban pang personal nga mga hagit. Namatikdan sa iyang abogado nga nakasinati siya og emotional breakdown sa wala pa ang maong biyahe ug nakahimo og sayop nga desisyon samtang anaa sa taliwala sa krisis.
Walay naangol ug walay kabtangan nga nadaot atol sa insidente, ug wala usab siyay rekord sa krimen kaniadto. Gisentensiyahan siya og walo ka bulan nga pagkabilanggo, apan gisuspinde ang maong sentensiya sulod sa 18 ka bulan. Kung motuman siya sa mga kondisyon sa korte ug dili na mohimo og dugang nga mga krimen, mahimo niyang malikayan ang aktuwal nga pagkabilanggo. Gimandoan usab siya nga moagi sa mga kalihokan sa rehabilitasyon ug dili moinom og alkohol sulod sa 90 ka adlaw.
Photo Courtesy: instagram
