Gipanghimakak sa Department of Education o DepEd ug Department of Budget and Management ang report nga walay pondo para sa pag-hire og mga magtutudlo sa 2027. Matud sa duha ka ahensya, P31.22 billion ang gilaan sa proposed 2027 national budget para mapun-an ang 64,530 ka authorized teaching positions.
Sa maong ihap, 31,614 ang existing vacancies, samtang 32,916 ang bag-ong teaching positions nga gi-aprobahan sa DBM niadtong Mayo. Hangtod Septiyembre 4, kapin 33,250 na ka teaching positions ang napun-an, apan adunay 25,019 pa ka bakante.
Ang clarification gisunod sa mga report nga wala maapil sa proposed 2027 budget ang request sa DepEd alang sa dugang 14,274 ka teaching positions nga mokabat og P4.29 billion. Gipasabot sa DepEd ug DBM nga lahi kini nga proposed batch ug dili apil sa 64,530 ka authorized positions nga aduna nang pondo alang sa hiring.
Busa, matud sa mga ahensya, ang wala pag-apil sa maong dugang nga positions dili angay sabton nga hiring freeze sa mga magtutudlo. Giingon ni Education Secretary Sonny Angara nga magpadayon ang hiring ug ang prayoridad mao ang mapun-an dayon ang mga bakanteng posisyon sa mga eskwelahan nga labing nanginahanglan.
Photo Courtesy: PNA
