Nagpadayon ang nagkalaing-laing programa ug assistance sa DSWD Davao del Sur alang sa mga katawhang nanginahanglan og tabang. Matud ni Nida Bolilan, head sa DSWD Davao del Sur, walay pobre o dato sa ilang pagserbisyo, kay kutob sa moduol ug mangayo og tabang, ilang tabangan.
Giklaro usab ni Bolilan nga walay kabag-ohan sa proseso sa pag-avail sa assistance. Ang bag-o lamang mao ang ilang opisina nga nahimutang na karon sa Brgy. Matti, Digos City, diin dili moubos sa 150 ka tawo ang ilang ma-cater bisan adunay gikan sa lagyong lugar.
Sa nagkalaing-laing assistance nga ilang ginadumala, medical ug burial assistance ang pinakadaghan nga request ug panginahanglan sa mga tawo. Dugang pa ni Bolilan, naningkamot usab sila nga personal nga makaadto sa mga venue, ilabi na kung adunay nakatakdang schedule sa paghatag og serbisyo.
Gipasalig sa DSWD Davao del Sur nga ipadayon ang paghatag og serbisyo ug assistance sa mga nanginahanglan, aron mas daghang katawhan ang makapahimulos sa mga programa sa ahensya.
