Gipangulohan sa mayor sa lungsod sa Mawab ang paghatag og cash assistance ngadto sa mga atleta, magtutudlo ug coach nga miapil ug mirepresentar sa lungsod atol sa niaging DDO Provincial Athletic Association Meet 2026.
Ang maong inisyatiba nagtumong sa pag-ila sa paningkamot, dedikasyon ug sakripisyo sa mga atleta ug sa ilang mga magtutudlo ug coach nga naggiya ug nag-andam kanila alang sa maong kompetisyon.
Pinaagi sa cash assistance, gipakita sa lokal nga panggamhanan ang paghatag og suporta sa sektor sa edukasyon ug sports, ilabina sa mga kabatan-onan nga nagtinguha nga mapalambo ang ilang talento ug abilidad sa nagkalain-laing disiplina sa sports.
Dako usab og papel ang mga magtutudlo ug coach sa pag-andam sa mga atleta, gikan sa ilang pagbansay hangtod sa aktuwal nga pag-apil sa kompetisyon. Ang ilang giambag nga panahon, kusog ug kahibalo nakatabang sa pagpalig-on sa disiplina, panaghiusa ug determinasyon sa mga representante sa Mawab.
Gilauman nga pinaagi sa padayon nga suporta sa lokal nga panggamhanan, mas daghang batan-ong Mawabeño ang madasig nga moapil sa sports ug magpadayon sa pagpalambo sa ilang mga abilidad, samtang nagdala og dungog sa ilang lungsod.
Photo courtesy: Mayor Myrill L. Apit fb
