Dala ang temang “United for Sports, Inspired for Excellence”, gitambongan sa 19 ka delegasyon gikan sa mga tunghaan sa elementarya ug sekondarya sa dakbayan ang pag-abli sa Malaybalay City Inter-School League Season 4 niadtong Agosto 29, 2024, didto sa Bukidnon National High School Oval.
Lakip sa mga aktibidad mao ang quickest banner raising contest, pagpaila-ila sa matag tunghaan pinaagi sa ilang mga chant ug hiyaw, pagpanumpa sa sportsmanship, ug ang pagpasiga sa Friendship Torch nga nagmarka sa pormal nga pag-abli sa liga.
Sa iyang mensahe, gipahinumdoman ni City Mayor J-Warren Pabillaran ang mga student-athletes nga i-una kanunay ang disiplina, pagrespeto sa mga magtutudlo ug ginikanan, ug ang tiunay nga pakig-uban sa dula ug nanghinaot nga magpadayon kini nga programa isip usab usa ka maayong ehemplo ug sukdanan sa mga mosunod pa nga administrasyon
Samtang gibutyag ni City Sports coordinator Al Adrian Antipasado nga tungod sa pagsaka sa gidaghanon sa mga misalmot nga eskwelahan gikan sa pito lang sa unang season hangtod sa 19 na karon, gilauman nga mas maging madasigon ug mas kulba-hinam ang mga dula karong tuiga
Magsugod na karong semanaha ang mga padula sama sa Basketball, Volleyball, Football, ug Baseball para sa mga kategoryang panlalaki ug pambabae sa nagkalainlaing venue sa dakbayan sa Malaybalay.
Photo Courtesy: Mayor Jay Warren Pabillaran
