Gihan-ay na sa Kagamhanang Panlalawigan sa Bukidnon ang opisyal nga kalendaryo sa mga aktibidad alang sa ika-18 nga Provincial Tourism Week karong Setyembre 2026 subay sa tema nga “Digital Agenda and Artificial Intelligence to Redesign Tourism.”
Usa sa mga nag-unang highlight sa maong selebrasyon mao ang Search for Emerging Tourist Spot: Discovering the Hidden Gems of Bukidnon, diin adunay 14 ka opisyal nga kalahug gikan sa nagkalain-laing Local Government Units (LGUs) nga nagtumong sa pagdiskobre sa mga bag-ong destinasyon, pagpalad sa turismo, ug pagpalambo sa lokal nga ekonomiya sa probinsya.
Magsugod ang opisyal nga mga aktibidad sa Setyembre 7, 2026 pinaagi sa usa ka September Convocation nga pagahimuon sa Kaamulan Open Theatre, Kaamulan Park, Malaybalay City. Sa maong tigum, ipresenta sa Provincial Tourism Office ang ilang mga nakab-ot nga maayong buhat gikan sa tuig 2025 hangtod karon, kauban ang Provincial Planning and Development Office (PPDO) ug ang Provincial Human Resource Management Office (PHRMO).
Isip pagtapos sa pagsaulog sa Culture and the Arts Week, ipahigayon sa Provincial Tourism Office ang “PAGDAYAW: A Night of Tourism, Culture and the Arts” karong Setyembre 18, 2026.
Sa maong kagabhion magpasundayag sa kultural nga kanta ug sayaw, ingonman ang paghatag og dungog ug premyo sa mga Tourism Statistics Top Data Providers, Digital Tourism Top Promoters, Best in Cultural Festival, Tourism Champion, mga nagdaog sa Search for Emerging Tourist Spots, ug ang pag-ila sa mga opisyal nga Bukidnon Icons alang sa tuig 2026.
Photo Courtesy:Bukidnon Provincial Tourism Office
