Patay ang 19-anyos nga driver sa motorsiklo samtang duha pa ang naangol sa nahitabong aksidente nga naglambigit sa tulo ka sakyanan sa Sayre Highway, Purok-2B, Aglayan, Malaybalay City niadtong Agosto 28, 2026, sa may alas 5:30 sa hapon. Nalambigit sa maong trahedya ang usa ka Suzuki Minivan, Suzuki Stingray wagon, ug usa ka Yamaha Sniper motorcycle.
Subay sa imbestigasyon sa mga awtoridad, giingong nag-overtake sa tuo nga bahin ang motorsiklo sa nag-unang Suzuki Wagon dihang pagbalhin sa pikas lane, nawad-an og kontrol ang drayber sa motorsiklo kung asa gituohang nakaligis sa dako nga bato (limestone) sa tunga sa dalan—hinungdan nga nitipas sa pikas linya pasugat sa minivan hinungdan sa panagbangga.
Gidali pagtabang sa MERU ang mga biktima apan gideklarang dead on arrival sa Bukidnon Provincial Medical Center ang driver sa motor. Samtang ang driver sa Minivan ug iyang asawa gidala sa Malaybalay Polymedic General Hospital alang sa pagtambal.
Ang mga sakyanan nga nalambigit sa disgrasya anaa na karun sa kostodiya sa mga otoridad alang sa dugang imbestigasyon
Photo Courtesy:Malaybalay City Police Station
