Napalgan nga wala nay kinabuhi ang 38-anyos nga lalaki human giingong nalumos sa usa ka sapa sa Purok 3, Barangay Vintar, Valencia City, niadtong Agosto 29, 2026, pasado alas 12:15 sa udto.
Base sa pasiunang imbestigasyon, nakuryentihan ang biktima sa iyang kaugalingong electro-fishing device hinungdan sa iyang pagkawala sa panimuot hangtod nga nalumos kini sa tubig.
Daling miresponde ang mga personahe sa Valencia City Police Station (CPS) human nakadawat og tawag gikan sa usa ka kanhi Barangay Kagawad mahitungod sa nakit-ang lawas. Pag-abot sa mga otoridad sa dapit, nakita ang biktima nga nakatiglom na sa tubig diin nakataod pa gihapon sa iyang likod ang gipasul-ob nga portable nga gamit sa pagpangisda nga naggamit og kuryente.
Sumala sa asawa sa biktima, nananghid kini kaniya sa alas 7:00 sa buntag sa maong adlaw aron mangisda apan wala na kini makapauli hangtod nga nadiskubrehan sa pipila ka mga menor de edad ang iyang lawas.
Sa inisyal nga pagsusi sa kapulisan, wala silay nakit-an nga bisan unsang timailhan sa foul play o samad sa lawas, samtang padayon ang gihimong imbestigasyon aron pormal ug hingpit nga matino ang tinuod nga hinungdan sa maong trahedya
Photo Courtesy: Valencia City Police Station
