Gipahibalo sa Department of Agriculture (DA) niadtong Lunes nga gipalig-on niini ang sistema pinaagi sa pagpagawas og “early warning”. Aron malikayan ang pagkadaot sa ani ug ang pag-ubos sa presyo sa umahan (farmgate prices), alang sa sektor sa agrikultura. Ubos sa Agricultural Marketing Assistance Service (AMAS) sa DA, kini nga mekanismo makatabang sa pagtagna sa posibleng mga problema sa suplay ug magtugot sa tukma nga koneksyon sa merkado tali sa mga lokal nga mag-uuma ug mga pumapalit nga mas sayo pa.
Sa usa ka pahayag, si Genevieve Velicaria-Guevarra, ang Head sa DA Kadiwa ng Pangulo (KNP) ug Assistant Secretary alang sa Agribusiness, Marketing, ug Consumer Affairs, nag-ingon nga kini nga estratehiya maghatag sa gobyerno og mas klaro nga panglantaw sa sitwasyon. Ang mga pahibalo nagtumong sa paglakip sa mga regular nga pagtagna sa ani, pagmonitor sa presyo sa umahan, ug mga timailhan nga mag-aghat sa paghatag og logistik ug uban pang matang sa tabang.
Matod ni Guevarra, makapalig-on kini sa pagplano sa ahensya, makatabang sa pagpugong sa mga dili maayong binuhatan ug pagpahimulos sa mga negosyante ug middlemen, ug makapahimo sa gobyerno nga mas paspas nga makatubag sa posibleng kakulang sa suplay o mga problema sa merkado. Ilabi na, gusto sa DA-AMAS nga mapahimuslan pag-ayo ang “early warning system” aron “dali” nga mapanalipdan ang kita ug kaayohan sa mga mag-uuma og utanon, tungod kay ang kanunay nga sobra nga suplay sagad makapabug-at sa merkado ug makapugos sa mga mag-uuma sa paglabay sa ilang wala mabaligya nga ani daplin sa dalan tungod sa taas nga gasto sa transportasyon.
Gusto usab sa DA nga himoong mas daling makuha sa mga mag-uuma ang tabang gikan sa Kadiwa, ilabi na niadtong anaa sa mga trading center. Matod ni DA Secretary Francisco Tiu Laurel Jr., kining “early warning system” makatabang sa pagpuno sa gintang samtang nagpadayon ang pagtukod sa mga imprastraktura sa agrikultura. Ang pagtukod og mga pasilidad sa cold storage ug pagproseso sa utanon aron malikayan ang pagkadaot sa lokal nga ani kabahin sa dugay nga solusyon sa gobyerno alang sa agrikultura.
Photo Courtesy:PNA
