Nakasakmit ang duha ka Filipino swimmers og medalya sa ilang tagsa-tagsa ka dibisyon atol sa pagtapos sa 4th Southeast Asia Open Water Championships sa Boracay. Si Jie Angela Mikaela Talosig, miyembro sa swimming team sa De La Salle University, nakakuha og bronze medal sa women’s 20-year-old and above division sa iyang international debut, human makarekord og oras nga 1 oras, 18 minutos ug 57 segundos.
Nakakuha og gold si Indonesia’s Nadya Sirasawati samtang silver si Thailand’s Musikul Hirunhas. Matod ni Talosig, gusto lang unta niya masinati ang pagkompetensya sa international level, busa dako ang iyang kalipay nga nakadaog siya og bronze atubangan pa sa iyang hometown crowd.
Nakakuha usab og bronze medal si Julia Jewels Pobleto sa girls 12-13-year-old 3-kilometer race human makarekord og 50 minutos ug 40 segundos. Nauna kaniya sila Thais Kanchana Konsub sa Thailand nga nakadaog og gold ug Aliyah Sawangmun nga nakakuha og silver. Hapit usab makasulod sa podium si Filipino swimmer Alfonso Joaquin de Mesa, nga nahimutang sa ika-upat sa boys 14-15-year-old division sa oras nga 1:04:57, kapin duha lang ka segundo ang iyang gilay-on sa bronze medalist nga si Kantapong Polyiem sa Thailand.
Giorganisar ang kompetisyon sa Philippine Aquatics Inc. ug gisanksyonan sa Southeast Asian Federation, uban sa suporta sa Aklan provincial government ug Malay municipal government. Miabot usab si Philippine Sports Commission Chairman Patrick Gregorio aron dasigon ang mga lokal nga swimmers ug personal nga mihatag sa mga medalya ngadto sa mga mananaog. Matod ni Gregorio, ang pag-host sa kompetisyon usa lamang ka dress rehearsal alang sa umaabot pang international open water events sa Pilipinas.
Photo courtesy: PAI/Pet Salvador
