Nakabawi ang Choco Mucho Flying Titans batok sa Capital1 Solar Spikers human modaog sa lima ka set, 22-25, 18-25, 25-17, 25-20, 15-8 sa pagsugod sa 10th PVL All-Filipino Conference Pulse Series didto sa SM Seaside Cebu Arena.
Gipangulohan nila Sisi Rondina ug Eya Laure ang comeback sa Choco Mucho human sa ilang pagrepresentar sa Alas Pilipinas sa Asian Games sa Japan. Si Laure maoy nanguna sa team pinaagi sa 22 puntos sulod sa upat ka set, samtang si Rondina nakatampo og 12 puntos bisan gikan lamang sa bench ug nakaduwa og sobra sa duha ka set.
Matod ni Laure, kanunay nilang pahinumdoman ang usag usa nga magtinabangay ug magsuportahay sa sulod sa court. Sa sinugdan, nakalamang ang Capital1 pinaagi sa ilang mga scorer nga sila Bella Belen, Vanie Gandler, ug Erika Santos nga hiniusang nakapuntos og 52. Apan nausab ang dagan sa duwa sa ikatulong set, diin nakabawi ang Choco Mucho ug nakuha ang ikaupat ug ikalimang set.
Napakyas usab ang Capital1 nga mapahimuslan ang ilang 13-8 nga bentaha sa ikaupat nga set. Ang maong kapildihan nakapait sa debut ni setter Julia Coronel, nga nakatala og 27 ka excellent sets. Sa laing duwa, gipildi sa Creamline ang Akari sa tul-id nga tulo ka set, 25-18, 25-21, 25-18.
Photo courtesy:Premier Volleyball League
