Giuyonan sa United States ug Iran nga palugwayan ang 60-adlaw nga ceasefire ubos sa Islamabad Memorandum of Understanding, samtang hapit na kini matapos sa Agosto 17.
Sumala sa mga tinubdan sa gobyerno sa Pakistan, gipahibalo na sa duha ka kampo ang ilang pagtugot ngadto sa mga mediator alang sa pagpalugway sa ceasefire. Apan nagpadayon pa ang pagbinayloay og mensahe sa US ug Iran aron mahibal-an kung unsa kadugay ang palugway sa kasabutan.
Nagkasabot ang US ug Iran sa Pakistan-brokered ceasefire niadtong Abril ug mipirma sa memorandum of understanding niadtong Hunyo 17 aron sugdan ang negosasyon alang sa usa ka pinal nga kasabutan.
Apan napakyas sa pagpadayon ang mga negosasyon tungod sa mga dili pagsinabtanay bahin sa security guarantees ug kagawasan sa paglawig sa Strait of Hormuz, usa sa pinakaimportante nga ruta sa kalibotan alang sa enerhiya ug patigayon.
Gikan Hulyo 8 hangtod Hulyo 24, mibalik ang mga pag-atake tali sa US ug Iran. Miatake ang Washington sa mga target sulod sa Iran, samtang mitubag ang Tehran pinaagi sa pag-atake sa giingon niini nga mga pasilidad ug kagamitan militar sa US sa pipila ka Arabong nasod, lakip ang Jordan, Bahrain ug Kuwait.
Photo Courtesy:SpecialEurasia
