Gitun-an sa Social Security System (SSS) ang pagpamuhunan sa foreign markets aron ma-diversify ang mga assets niini ug mapalig-on ang pension fund sa dugayng panahon.
Sumala kang SSS President ug CEO Robert Joseph de Claro, padayon gihapon ang ilang suporta sa local capital market, apan ang maayong financial position sa ahensya naghatag og kahigayonan sa pagpangita og dugang investment opportunities.
Sa Hunyo 30, 2026, mikabat sa P1.27 trilyon ang consolidated investments sa SSS, lakip ang government securities, equities, property, member loans ug corporate bonds.
Nakakuha usab ang SSS og P27.16 bilyon nga actual investment income, katumbas sa 4.53 porsyentong annualized return. Gipasiugda ni De Claro nga dili pasabot sa foreign investments nga biyaan sa SSS ang local market, kundili aron mas ma-diversify ang ilang investments.
Target sa SSS nga motaas ngadto sa P2 trilyon pagsapit sa 2030 ang ilang reserve fund aron maseguro ang social security protection sa mga miyembro ug pensioner.
Photo Courtesy: PNA
