Nakitaan og gamay nga pagkunhod ang inflation rate kon pagsaka sa presyo sa palaliton sa tibuok Nothern Mindanao alang sa bulan sa Hulyo ning tuiga. Sa datus nga gipagula sa Philippine Statistics Authority kon PSA Region X, niubos gamay sa 6.4% ang inflation sa bulan sa Hulyo gikan sa 7.0% sa bulan sa Hunyo.
Samtang subay sa report ni Maria Liza Bigornia, Chief Statistical Specialist sa PSA Misamis Oriental, ang probinsya nakatala og 6.1% nga inflation gikan sa 6.4% nga inflation sa bulan sa Hunyo. Ang Cagayan de Oro City adunay 4.8% inflation rate gikan sa 5.6% sa bulan sa Hulyo. Namatikdan sab nga ang Lanao del Norte ang adunay pinakataas nga inflation rate nga anaa sa 8.3% sa tibuok rehiyon.
Nag-unang rason nga nagpakunhod sa inflation rate sa Northern Mindanao ang pagkunhod o pag-usab-usab sa presyo sa produktong petrolyo sa pangkalibutang merkado nga apektado sab sa nagapadayong kagubot sa Middle East.
Kung mamatikdan nga adunay gamay nga kausaban sa presyo sa produktong petrolyo, magdomino effect sab kini sa ubang palaliton o galastuhan sama sa pagkaon ug renta sa balay.
Sumala pa ni Dr. Janith Aves, Regional Director sa PSA X nga tuod adunay pagkunhod gamay sa inflation rate, apan dili sab nila masiguro nga magpadayon na kini sa pagkunhod tungod na sab sa bag-uhay lang nga pagsaka sa presyo sa produktong petrolyo sa ulahing bahin sa bulan sa Hulyo.
Hinuon, gipaniguro ni Dr Aves nga ang 6.4% nga inflation sa rehiyon, nahisakop pa sa target ranges sa Bangko Sentral ng Pilipinas nga anaa sa 5.6% to 6.6%.
Photo courtesy: Pinoy Weekly
