Gipaniguro sa Department of Public Works and Highways (DPWH) nga higpit nga bantayan ang P107.4 bilyong flood control budget alang sa 2027.
Matud ni DPWH Secretary Vince Dizon, maampingong gisusi sa departamento ang alokasyon aron masiguro nga ang mga proyekto sa budget husto ug maayong naplano. Matud pa niya, dili lamang gobyerno ang kinahanglang mobantay niini, kondili apil ang mga local government units, civil society, NGOs, ug katawhan.
Ang higpit nga pagmonitor miabot taliwala sa padayong pagsaway sa gobyerno tungod sa mga problema sa pagbaha ug alegasyon sa anomalya sa pipila ka flood control projects. Matud ni Dizon, mas ubos ang P107.4 bilyon kumpara sa miaging flood control budget nga hapit mokabat og P300 bilyon matag tuig. Ubos sa bag-ong pamaagi, ang matag proyekto kinahanglan adunay detalyadong plano ug koordinasyon sa mga probinsya ug lokal nga panggamhanan aron matubag ang tinuod nga panginahanglan sa matag lugar.
Gipasiugda usab ni Dizon ang Transparency Portal aron masubay sa publiko ang mga proyekto sa gobyerno. Samtang makatabang ang declogging ug dredging, giila niya nga dili dayon masulbad ang pagbaha. Lakip sa long-term solutions nga gitun-an ang mga dam, water-retention structures, ug ang dugay nang gisugyot nga spillway gikan sa Laguna Lake padulong sa Manila Bay.
Dugang ni Dizon, kinahanglan masiguro nga ang pondo direkta nga magamit sa mga proyekto nga makahatag og malungtarong solusyon sa mga komunidad nga kanunayng apektado sa pagbaha.
Photo Courtesy: Peoples Asia
