Nakakolekta ang Bureau of Internal Revenue (BIR) og ₱2.003 trilyon sa unang pito ka bulan sa tuig, nga milapas sa ilang target nga ₱1.99 trilyon. Mas niuswag usab ang koleksyon og ₱102.60 bilyon o 5.4 porsyento kumpara sa parehas nga panahon niadtong miaging tuig, tungod sa mas maayong pagsunod sa mga taxpayers ug mga reporma sa ahensya.
Matod ni BIR Commissioner Charlito Martin R. Mendoza, nakab-ot na sa ahensya ang hapit 60 porsyento sa tibuok tuig nga target sa koleksyon alang sa 2026. Sa Hulyo lamang, nakolekta ang ₱358.44 bilyon, mas taas og ₱22.37 bilyon o 6.66 porsyento kumpara sa target nga ₱336.07 bilyon.
Giingon sa BIR nga ang padayon nga pagsaka sa kita resulta sa ilang BIR DARES reform agenda, nga nagpunting sa pagpamubo ug pagpasayon sa tax filing, pagpalapad sa digital services, mas maayong serbisyo sa taxpayers, mas lig-on nga audit, ug estriktong pagpatuman batok sa tinuyo nga paglikay sa buhis.
Photo courtesy: Bureau of Internal Revenue Philippines
