Pormal na nga giablihan ang usa ka bulan nga selebrasyon sa Higalaay Festival 2026 isip pagsaulog sa kapistahan sa patron sa syudad, St Augustine. Gipahigayon ang grand launching sa nilabayng gabie sa Rio de Oro Boulevard kung asa gitambungan kini sa daghang mga bisita ug giduyugan sa libuan ka mga kagay-anon.
Gipangunahan ang selebrasyon ni City Mayor Rolando Klarex Uy kung asa gipasabot sa Mayor nga ang Higalaay Festival 2026 dili lamang simpleng selebrasyon apan pagpasalamat sab kini sa mga grasya nga nadawatan sa syudad taliwala sa mga giatubang niini nga mga hagit ug kalisdanan.
Dugang sa Mayor, ang pulong nga Higala, pulong nga makapaila sa Cagayan de Oro sa tibuok kalibutan ug paghulagway sa mga Kagay-anon isip maabi-abihon ug andam muwelcome sa tanang mubisita sa syudad. Karong tuiga nga Higalaay Festival, 59 ka mga events ang giandam sa syudad nga gilangkuban sa 10 ka core events, 12 ka main events, 6 ka minor events ug 30 ka parallel events nga gigahinan og P20 milyones ug mapatuman pinaagi na sab sa tabang sa pribadong sektor ug uban pang sponsors.
Photo Courtesy: Project Lupad
