Hugot nga gipahayag sa Department of Foreign Affairs (DFA) nga dili kini motugot sa bisan unsang matang sa pagpanghadlok o pagpanghulga batok kang bisan kinsa, human makit-i ang mga lungon sa nagkalain-laing bahin sa Metro Manila.
Base sa pasiunang imbestigasyon sa National Capital Region Police Office (NCRPO niadtong Biyernes, Agosto 7, adunay kinatibuk-ang lima ka lungon ang nakit-an sa Sta. Cruz, Manila; Brgy. 54, Caloocan City; Brgy. South Triangle, Quezon City; Brgy. Sta. Teresita, Quezon City; ug Gil Puyat, Makati City.
Sa usa ka pahayag nga gipagawas niadtong Agosto 7, namatikdan sa DFA nga bisan pa man og gihatagan og bili sa nasud ang katungod sa kagawasan sa pagpahayag, gikondena niini ang pagpakatag sa bisan unsang matang sa pagpanghadlok o kapintasan.
Dugang pa sa ahensya nga ang pagpakita niining mga misteryosong lungon dili nagpakita sa tubag sa gobyerno ngadto sa mga tensyon sa internasyonal nga lebel, ni nagrepresentar kini sa sentimento sa mga Pilipino kalabot sa pagsaway o kasagmuyo sa mga isyu sa politika.
Gipasalig sa ahensya ngadto sa publiko nga nakig-alayon kini sa mga awtoridad aron hingpit nga imbestigahon ang mga panghitabo luyo niini ug manubag ang mga mapamatud-an nga nalambigit.
Photo Courtesy: Philippine News Agency
