Nasikop na sa mga awtoridad ang 19-anyos nga suspek pagpatay sa usa ka miyembro sa LGBTQ+ nga giilang si “Betty” sa may Capitol Grounds sa Malaybalay City niadtong Hulyo 27, 2026.
Kini ang gipahibalo ni City Councilor Jason Chad Ayala uban sa lokal nga pangagamhanan, kinsa nagpadayag nga pinaagi sa maong pagdakop mahatagan na og hustisya ang pamilya sa biktima.
Nadakpan ang suspek nga giilang si alyas “Boy”, residente sa Barangay Ninoy Aquino, pinaagi sa tabang sa usa ka informant ubos sa programang “Bring Me” sa dakbayan.
Nahitabo ang pag-aresto sa hiniusang operasyon sa kapulisan sa Malaybalay ug Kalilangan didto sa Sitio Sabang, Central Poblacion, Kalilangan. Misuway pa unta sa pagpanunggab ang suspek sa usa ka pulis samtang gidakop, hinungdan nga dugang kaso nga Direct Assault ug Illegal Possession of a Deadly Weapon ang giatubang niini.
Gipasalamatan sa lokal nga administrasyon ang kapulisan sa ilang walay hunong nga pagpangita sa suspek ug ang informant nga naghatag og impormasyon sa gitagoan niini. Sa kasamtangan, anaa sa kustodiya sa Kalilangan Municipal Police Station ang suspek alang sa saktong disposasyon ug legal nga proseso
Photo Courtesy:Jason Chad Ayala/ Kalilangan MPS
