Patay ang sikat nga Mexican social media influencer nga si Cesar Gastelum human kini gipusil sa duha ka wala nailhang lalaki samtang nag-livestream kauban ang iyang mga higala sa gawas sa usa ka fast food restaurant sa Culiacan, Mexico.
Si Gastelum, nga adunay halos 600,000 ka followers sa TikTok, gipusil sa drayber sa usa ka motorsiklo nga miduol kanila samtang nakatabon ang mga nawong pinaagi sa helmet.
Gikumpirma sa mga opisyal sa Sinaloa ang pagkamatay sa maong content creator ug nipahigayon na sila og makuting operasyon aron matumbok ug madakpan ang suspek. Nahitabo ang pagpamusil taliwala sa padayong kagubot ug away sa mga kriminal nga grupo nga nag-ilogay sa kontrol sa maong siyudad.
Kahinumduman nga susamang insidente ang nahitabo kaniadtong Mayo 2025 diin gipusil usab samtang nag-livestream ang beauty influencer nga si Valeria Marquez.
Nadakpan kaniadtong Hulyo ang giingong utok niini nga si Ramon Angel Alvarez Ayala, alyas “El R-1,” nga sakop sa Jalisco New Generation Cartel (CJNG) ug suspek usab sa pagpapatay sa mayor sa Uruapan niadtong Nobyembre 2025.
Photo Courtesy:Reuters/Firstpost
