Nakaplagan ang kalabera sa usa ka tawo sa may tubohan nga bahin sa Barangay Catumbalon, Valencia City niadtong Agosto 4, kinsa mao ang 20-anyos nga lalaki nga dugay nang gipangita sa iyang pamilya. Giila ang biktima nga si Jose Candia Jr., residente sa Purok 5, Lumbo, Valencia City, nga gituhoang nawala sukad niadtong Hulyo 12, 2026.
Sa eksklusibong pakighinabi sa Juander Radyo Malaybalay, gipadayag ni Reymond Sistoso, higala sa amahan sa biktima, nga milakaw si Candia sa ilang panimalay tungod sa personal ug problema sa pamilya nga gikaingong nakaapekto sa iyang kahimtang.
Usa sa mga gitan-aw nga ilhanan sa pag-ila kaniya mao ang violet nga jersey shorts nga nakit-an duol sa kalabera og matod pa mitukma sa sinina nga gisul-ob sa biktima sa wala pa kini mawala.
Samtang, sa inisyal nga impormasyon gikan sa mga otoridad, walay nakita nga timailhan sa foul play samtang nagpadayon usab ang imbestigasyon ug proseso sa pormal nga pag-ila sa nakaplagang kalabera.
Photo Courtesy: Valencia CPS
