Gilockdown ang Malaybalay City National Science High School human nakadawat og online threat nga naghulga nga pusilon ang mga estudyante gikan Grade 7 hangtod Grade 12 kagahapon sa buntag Agosto 05, 2026.
Sa eksklusibong pakighinabi sa Juander Radyo Malaybalay, gipahayag ni Teacher II John Mark Carpentero, chairman sa Learners’ Rights Protection Committee, nga gipatuman dayon ang lockdown isip preventive measure aron mapanalipdan ang mga estudyante ug mga kawani.
Sumala pa, nadawat sa eskwelahan ang maong hulga gikan sa usa ka dummy account nga ginganlang “Kem Kem” diin gihisgutan nga nagsugod na ang ilang grupo sa pagpahiluna sa ilang mga miyembro.
Matud pa ni Carpentero, ikaduha na kini nga higayon nga nakadawat sila og hulga gikan sa maong account—diin sa unang insidente, pagpamomba (bomb threat) ang giingong buhaton niini.
Tungod sa maong nga pahayag, gipabilin ang mga estudyante sulod sa ilang mga classroom aron malikayan ang kaguliyang, samtang ang mga estudyante sa afternoon shift gidala sa covered court alang sa ilang kaluwasan samtang naghulat sa dugang nga aksyon.
Sa karon, padayon ang koordinasyon sa administrasyon sa eskwelahan ug sa mga awtoridad aron matino ug masubay kon kinsa ang luyo sa maong online threat. Hinuon nagpadayon ang normal nga klase sa maong adlaw.
