Pormal nang gisugdan ang operasyon sa bag-ong Integrated Bus Terminal nga nahimutang sa Barangay Hubang, niining lungsod, niadtong Lunes, Agosto 3, 2026. Sa unang adlaw sa pag-abli sa terminal, positibo ang reaksyon sa kadaghanan sa mga pasahero. Matud pa kanila, mas hapsay na ang dagan sa pagbiyahe, mas lapad ang maong pasilidad, ug mas komportable ang dapit nga hulatanan sa mga mosakay.
Bisan pa man niini, wala malikayan ang pipila ka mga kabalaka gikan sa ubang mga sumasakay. Matud sa uban, dako kini nga kausaban ug nagdala og dugang gasto sa pletehan. Tungod kay medyo layo sa sentro sa lungsod ang nahimutangan sa bag-ong terminal, kinahanglan pa silang mosakay og laing transportasyon paingon didto, butang nga dugang karga sa ilang inadlaw-adlaw nga badyet.
Sa pagkakaron, padayon ang hugot nga pagmonitor sa mga otoridad sa dagan sa operasyon. Gihimo kini aron masiguro nga hapsay ang implementasyon sa bag-ong sistema sa transportasyon, ug aron daling matubag ang mga mulo ug kabalaka sa mga pasahero lakip na sa mga transport operators sa maong lugar.
Photo courtesy: PTV
