Giaprubahan na ni presidenti Ferdinand Marcos Jr. ang paggahin og pondo alang sa pagtukod sa labing unang military space center sa Armed Forces of the Philippines (AFP) nga ginalantaw nga mahimong usa ka hingpit nga space command o space force sa umaabot.
Sumala ni AFP Chief General Romeo Brawner Jr., ang maong dako nga proyekto ipatuman sa pakigtambayayong sa Philippine Space Agency (PhilSA) aron mapalig-on ang modernong depensa sa nasud.
Nag-unang tumong sa maong programa nga seryosong mapalambo ang kapasidad sa militar sa aspeto sa pagpaniid (surveillance), komunikasyon, ug ang mas lapad nga paggamit sa mga modernong teknolohiya sama sa drones ug uban pang matang sa defense systems.
Target sa AFP nga hingpit nang makabaton ug makapahimutang sa unang mga defense satellites sa Pilipinas pag-abot sa tuig 2028.
Gipasabot ni General Brawner nga gikinahanglan gayod nga unahon ang pagpatukod sa space center aron adunay saktong pasilidad sa pagbansay sa mga lokal nga eksperto ug sa pag-organisar sa gikinahanglang pwersa. Kini nga lakang pagsiguro nga andam na ang tibuok organisasyon sa dili pa mamahimong hingpit nga operasyonal ang maong mga satellite alang sa seguridad sa nasud
Photo Courtesy: Presidential Communications Office
