Gipaspasan na sa PrimeWater ang mga proyekto alang sa pagpalambo sa suplay sa tubig sa Malaybalay City kung asa nahuman ang dinaliang rehabilitasyon sulod lamang sa wala pay usa ka bulan.
Gipaabot ni City Mayor Jay Warren Pabillaran ang iyang pasalamat sa PrimeWater ug sa bag-ong tag-iya niini sa pagtuman sa ilang saad, diin ang sunod nga operational nga lakang mao ang paghuman sa linya sa tubo gikan sa Sumpong padulong sa maong pasilidad aron hingpit nang masugdan ang pag-apod-apod sa tubig ngadto sa mga konsumidor.
Ang maong kalamboan agi og pagtamod sa nasabutan nga “surgical approach” didto sa Manila kaniadto, diin giduso ang dinalian ug saktong pag-ayo sa mga linya sa tubo sa siyudad.
Matud pa ni Mayor Pabillaran, dako ang iyang pagsalig sa maong pamaagi kay nakita niya ang paspas nga agi sa kontraktor itandi sa iyang pagbisita sa dapit niadtong niaging bulan diin nagsugod pa lamang ang maong trabaho
Ubos sa maong kasabutan, nagsaad ang PrimeWater nga magbubo og puhunan nga moabot ngadto sa ₱500 milyon sulod sa lima ka tuig alang sa nagkadaiyang proyekto sa tubig sa siyudad. Bisan pa man ug hinay-hinay ang agi sa uban nga mga imprastraktura, gihisgutan sa mayor nga mas maayo na lang nga adunay padayon nga progreso kaysa sa wala gayoy kalihokan, dungan sa paglaum nga mas mosalig ug molambo pa ang serbisyo sa tubig sa tibuok Malaybalay sa umaabot nga mga katuigan
