Nanawagan karon ang Provincial Indigenous Peoples Mandatory Representative (IPMR) Datu Makayuba Renato Sumbongan sa Bukidnon ngadto sa publiko nga dili magpanic ug dili basta-basta magpadala sa mga nangatalaang post sa social media mahitungod sa isyu sa Pangayaw kon Manggahat didto sa San Fernando ning bag-o lang.
Kini human gikumpirma sa opisyal pinaagi sa pakighinabi sa Juander Radyo Malaybalay nga kontrolado ang sitwasyon ug padayong ginalihok sa mga Tribal Datus aron dinalian nga mahatagan og kalinaw ang maong dapit.
Giklaro sa Provincial IPMR nga tinuod nga nagpagawas og memorandum ang Barangay Namnam ug ang ilang Tribal Council alang sa dugang seguridad sa mga partikular nga sitio ug pag-alerto sa mga mang-uuma nga dili una magsayo sa pag-adto sa bukid. Apan iyang gihatagan og gibug-aton nga ang maong lakang gihimo isip “precautionary measure” o pag-amping lamang ug dili aron maghatag og kahadlok sa mga lumulupyo.
Nabalaka ang opisyal tungod sa naghinobrang mga impormasyon ug mga hulagway nga nanggawas karon sa Facebook nga wala na nagsubay sa kamatuoran ug nagmugna lang og kalibog
Subay niini, iyang giawhag ang tanang katawhan nga magmabinantayon apan magpabiling kalmado, ug mosalig lamang sa opisyal nga pamahayag gikan sa mga datus ug lokal nga gobyerno kinsa maoy direktang nagasulbad sa maong suliran.
Photo Courtesy: Datu Makayuba Renato Sumbongan
