Nasinati karon sa nasod sa Cuba ang halapad nga power outage human kalit nga mihagsa o na-collapse ang ilang national electric grid niadtong Lunes sa udto (oras sa Cuba). Matod sa grid operator sa nasod nga UNE, ang kalit nga pagkapalong sa tibuok sistema sa kuryente miresulta sa kawalay suplay sa kuryente sa gibana-bana nga napulo (10) ka milyong mga residente.
Gisusi pa karon sa mga awtoridad ang nag-unang hinungdan sa total blackout, apan dugay na nga dakong suliran sa Cuba ang pabalik-balik nga krisis sa kuryente. Sa mga nangaging mga bulan, nakasinati na ang nasod og pipila ka oras hangtod pipila ka adlaw nga mga brownout tungod sa karaan na nga mga imprastraktura sa enerhiya ug ang kakulang sa suplay sa gasolina nga gikinahanglan alang sa ilang mga planta.
Kini nga problema mas gipa-grabe nga krisis sa ekonomiya ug limitadong suplay sa enerhiya, diin gani sa wala pa ang pag-collapse sa grid, halos 2/3 na sa nasod ang ngitngit ug walay kuryente. Tungod niini, daghang mga Cubano ang labing naapektuhan gumikan sa grabeng init sa panahon ug sa kalisod sa paghimo sa ilang inadlaw-adlaw nga mga buluhaton, sama sa pagtrabaho ug pagtungha.
Photo courtesy: CNN
