Gilihok na sa Barangay Macabalan ang pagsulbad sa problema sa nagtapok nga basura human kini nagtrending sa social media ug nakadani sa atensyon sa mainstream media tungod sa makalilisang nga baho ug nagkatapok nga hugaw sa lugar.
Matud ni Barangay Kapitan Engr. Saniel Raipon, mas palig-onon sa barangay ang pagmonitor sa paglabay sa basura, ilabina sa Sitio Punta, diin adunay namonitor nga mga tawo nga nagpataka og labay sa basura nga gituohang gikan sa ubang lugar o barangay.
Naglaum ang barangay nga pinaagi sa mas hugot nga pagpatuman sa mga ordinansa ug kooperasyon sa publiko, masulbad ang problema sa basura ug mapadayon ang kalimpyo sa komunidad.
