Gilaraw karon ni City Councilor ug ABC President Marlo Tabac ang pag-amenda sa kasamtangang Noise Regulation Ordinance sa dakbayan nga napasa pila ka dekada na ang nilabay.
Sumala ni Tabac, karaan na ang ordinansa ug dili na makatubag sa mga modernong suliran kalabot sa kasaba, ilabi na diha sa mga negosyo ug mga komunidad.
Usa sa labing dako nga kausaban nga gisugyot sa konsehal ang pagpataas sa oras sa pagdili sa pagsaba-saba. Gikan sa kasamtangang alas-12:00 sa tungang gabii hangtod alas-5:00 sa buntag, plano kining sugdan na sa alas-10:00 sa gabii hangtod alas-5:00 sa buntag.
Gipasabot ni Tabac nga ang balaod dili lamang magsubay sa mga pamatigayon sama sa mga bar, kondili ipatuman usab kini ngadto sa mga residential areas. Kini tungod sa mga mulo batok sa pipila ka mga residente nga magpatuyang gihapon sa pagsaba-saba gamit ang mga kusog nga sound system, amplifier, ug karaoke o videoke machine bisan dis-oras na sa gabii.
Ubos sa sugyot, obligado na unya nga mokuha una og permit ang kinsa man nga mopahigayon og mga tigom o community gatherings aron tugotan nga makapatogtog.
Gipatinguha sa konsehal ang lakang tungod kay dako matod pa nga distorbo sa publiko ang grabe nga kasaba, ilabi na sa mga kabataan nga nagtungha, mga katigulangan, mga adunay balatian, ug mga trabahante nga nanginahanglan og saktong pahuway sa kagabhion.
Photo courtesy: Cagayan de Oro City Council
