Gipalig-on sa Department of Agriculture (DA) ang ilang mga pagpangandam batok sa posibleng epekto sa El Niño sa sektor sa agrikultura. Sumala kang Agriculture Secretary Francisco Tiu Laurel Jr., padayon ang programa sa irigasyon aron matabangan ang mga mag-uuma nga mapadayon ang ilang produksiyon bisan pa sa kakulang sa ulan ug grabeng kainit. Gipalapdan usab sa ahensya ang mga cold storage facility aron hapsay nga matipigan ang mga ani ug mamenosan ang post-harvest losses.
Nag-andam usab ang gobyerno og pinansyal nga tabang alang sa mga mag-uuma nga maapektuhan sa El Niño. Base sa forecast sa PAGASA, adunay 79 porsiyentong posibilidad nga magsugod ang El Niño sa Hunyo ug molungtad hangtod Agosto 2026, nga posible pa gayod mopadayon hangtod sa unang bahin sa 2027. Gilauman nga magdala kini og taas nga temperatura, kakulang sa ulan, ug hulaw nga mahimong hinungdan sa dakong kadaot sa agrikultura.
Samtang nagkagamay ang ani tungod sa hulaw, posible usab nga mosaka ang presyo sa mga produktong pangkonsumo sama sa bugas, utanon, ug uban pang pagkaon. Tungod niini, gidasig sa DA ang publiko nga magtinipid sa paggamit sa tubig aron masiguro ang igo nga suplay sa umaabot nga mga bulan ug malikayan ang mas grabeng epekto sa El Niño sa nasud.
Photo Courtesy: istock
