Suportado sa Philippine National Police (PNP) ang sugyot nga ipaubos ngadto sa 12-anyos ang minimum age of criminal responsibility sa nasud.
Matud ni PNP Spokesperson Colonel Allen Rae Co, nagbase ang ilang ahensya sa nagkataas nga ihap sa mga kabatan-onang nalambigit sa nagkalain-laing krimen sa tibuok nasud.
Gihimo ang pahayag atol sa press briefing sa Presidential Communications Office (PCO) Martes, Hunyo 23, 2026, human sa makalilisang nga insidente sa pagpamusil sulod sa San Jose National High School sa Tacloban City niadtong Lunes sa buntag, Hunyo 22, 2026 nga miresulta sa kamatayon sa tulo ka mga estudyante.
Sumala kang Co, nakamatikod ang PNP sa pagsaka sa gidaghanon sa mga Children in Conflict with the Law (CICL) base sa ilang mga datos ug pagtuon.
Bisan pa niini, gipasabot sa PNP nga importante gihapon nga tagdon ang “discernment” o ang abilidad sa usa ka menor de edad sa pagsabot sa husto ug sayop sa dihang hisgutan ang maong gisugyot.
Padayon pa karon ang diskusyon bahin sa posible nga pag-usab sa balaod nga nagtakda sa edad sa criminal responsibility sa Pilipinas.
Photo Courtesy : Philippine News Agency
