Arestado sa kapulisan sa syudad sa Tagum ang usa ka senior citizen nga misyonaryong pastor nga giila lamang sa alyas nga “Ramir”, 67-anyos, kasamtangan nga nagpuyo sa Brgy. Mesaoy, New Corella Davao del Norte ug ang tinuod nga address niini mao ang Doña Clara Subdivision, Concepcion Pequeña, Naga City, Bicol region.
Ang maong operasyon gikasa sa Manhunt Charlie Operation ug sa hiniusang pwersa sa Tagum City Police Station, Davao del Norte Police units, Police Station 3 sa Naga City Police Office, ug RMFB 11 sa Gante 3 Street, Barangay Magugpo West, Tagum City, Davao del Norte, Hunyo 22, 2026.
Subay sa report, ang maong suspek gidakop pinaagi sa mga warrant of arrest nga giisyu sa mga korte sa Naga City, Camarines Sur.
Lakip sa iyang giatubang nga mga kaso ang paglapas sa RA 7610 o balaod batok sa pagpang-abuso sa kabataan, daghang ihap sa statutory rape ubos sa RA 11648, paglapas sa Safe Spaces Act o RA 11313, ug mga kaso sa acts of lasciviousness. Adunay mga kaso nga walay gitakdang piyansa samtang ang uban adunay rekomendadong piyansa nga mokabat og P200,000 matag kaso.
Human sa pagdakop, gidala ang suspek sa kustodiya sa kapulisan alang sa hustong dokumentasyon ug legal nga proseso.
Samtang nagpadayon usab ang koordinasyon tali sa mga otoridad sa Davao del Norte ug Camarines Sur aron masiguro ang hapsay nga pag-atubang sa suspek sa mga kasong gipasaka batok kaniya.
Photo Courtesy : Dickman Law Office
