Gisuportahan ni Agriculture Secretary Francisco Tiu Laurel Jr. ang usa ka policy resolution gikan sa pribadong sektor nga nanawagan sa paspas nga pagpatuman sa 5 ka porsiyentong coco-biodiesel blend o B5 sa nasud.
Ang maong sugyot gipasa na ngadto sa Senado ug sa Department of Energy (DOE) aron masusi ug mapadayon ang implementasyon niini.
Kabahin sa endorsement sa Department of Agriculture (DA) ang Resolution No. 03, Series of 2026, nga gipasa sa Philippine Council for Agriculture and Fisheries–National Sectoral Committee (NSC) sa mga lubi, ubos sa pagpangulo ni chairperson Charles Avila.
Tumong sa resolusyon nga mapalapdan ang paggamit sa biodiesel nga gikan sa lana sa lubi aron mapataas ang panginahanglan sa lokal nga produkto niini.
Sumala sa DA, ang pagbalhin ngadto sa B5 makahatag og dugang merkado alang sa mga mag-uuma sa lubi ug makatabang sa pagpalig-on sa industriya niini sa nasud.
Gilauman usab nga makahatag kini og positibong epekto sa ekonomiya samtang gipalambo ang paggamit sa mas limpyo ug mas mahigalaong alternatibong sugnod.
Photo Courtesy : Paper and tea
