Giklaro sa mga mountain climber enthusiasts nga dili angay alang sa mga bag-ong hiker o beginners ang pagsaka sa Mount Kalatungan sa Bukidnon tungod sa kakuyaw sa mga agianan ug sa posibleng risgo sa kinabuhi kon dili andam ug walay igong kasinatian ang mosaka.
Sumala kang Ma. Conception A. Alamis, usa ka mountain climber enthusiast, importante nga makaagi una sa mountain climbing course ang mga interesado sa pagsaka sa kabukiran aron masabtan ang mga angay buhaton ug ang dapat likayan alang sa ilang kaluwasan.
May kalabutan niini, giingon ni Alamis nga daghang anggulo ang kinahanglan tan-awon sa imbestigasyon sa pagkawala sa hiker nga si Alkharj Zamayla, 31-anyos, nga namissing niadtong Hunyo 12, 2026 samtang nagsaka sa Mount Kalatungan.
Gipasiugda usab niya ang kamahinungdanon sa koordinasyon sa mga hiker ngadto sa lokal nga panggamhanan ug sa mga lumad o lokal nga residente sa lugar aron makakuha og hustong giya ug kasayuran bahin sa kahimtang sa bukid. Giawhag usab ang mga mosaka sa kabukiran nga siguruhon ang ilang kahandam sa pisikal ug mental nga aspeto, ug mosunod sa mga lagda sa kaluwasan aron malikayan ang mga insidente sa kabukiran.
Photo courtesy: Ma. Conception Alamis
