Naangol ang tulo ka indibidwal human nagbangga ang usa ka Isuzu Cargo Truck ug Fuso Truck niadtong nakalabay nga adlaw sa National Road, Purok 17, Barangay Poblacion, Valencia City, Bukidnon.
Base sa imbestigasyon sa Valencia City Police Station, nagbiyahe ang Isuzu Cargo Truck (Veh-1) gikan sa Valencia City padulong sa Malaybalay City subay sa Sayre Highway. Samtang ang Fuso Truck (Veh-2) nga nagikan sa gawas sa Flying-V Gas Station misulay sa pagliko sa wala padulong sa proper sa Valencia City ug didto nabangga sa wala nga bahin ug wala nga likod nga ligid sa unang truck.
Tungod sa kakusog sa impact, ang drayber sa Isuzu Cargo Truck nakaangkon og mga samad kinsa daling gidala sa Valencia City Polymedic Medical Center para sa medikal nga pagtagad. Samtang ang 18-anyos nga pasahero sa maong truck ug ang drayber sa Fuso Truck nakahiagom sab og ginagmay nga samad ug wala na nagpahatod sa ospital.
Gawas sa mga naangol, parehong nakaangkon sa kadaot ang duha ka sakyanan. Gipadayag usab sa kapolisan nga gituohang ubos sa impluwensya sa ilimnon nga makahubog ang drayber ug pasahero sa Isuzu Cargo Truck sa dihang nahitabo ang insidente.
Photo courtesy: Valencia City Police Station
