Nakasulod ang Iligan City isip national finalist sa lima ka kategorya sa Association of Tourism Officers of the Philippines o ATOP Pearl Awards 2026, nga nagpakita sa padayong paningkamot sa siyudad sa pagpalambo sa turismo ug pagpromote sa lokal nga mga atraksyon.
Lakip sa mga kategorya ang Best Tourism Promotions Brochure, Best Tourism Promotions Video, Best Community-Based Practices alang sa Sikyop Cooperative, Best Sports Tourism alang sa unang Mayor Frederick W. Siao Bangkathon 2025, ug Best Local Hosting Event alang sa “Click, Kaon, Repeat.” Gipasidunggan usab ang kontribusyon sa komunidad sa mga Higaonon sa Rogongon pinaagi sa pagpalambo sa Sikyop Cooperative isip agricultural ug ecotourism destination.
Sumala sa Iligan City Tourism Office, ang maong kalampusan resulta sa panaghiusa sa mga tourism stakeholders, lokal nga komunidad, ug mga opisyal sa siyudad. Lauman nga ipahigayon ang ATOP Pearl Awards Night sa Oktubre 22, 2026, sa Ormoc City, Leyte.
