Angol ang usa ka lalaki human giingong gidunggab sa iyang kaugalingong pag-umangkon atol sa panag-away nga nahitabo sa Purok Yellowtop, Barangay Tugop Muslim, lungsod sa Titay, Zamboanga Sibugay, pasado alas-12:57 niaging adlaw.
Giila ang biktima nga si Danny Boy Acedo, kinsa anaa pa sa ospital samtang gipaubos sa operasyon tungod sa grabe nga mga samad nga naangkon sa nagkadaiyang parte sa kalawasan.
Base sa inisyal nga imbestigasyon sa Titay Municipal Police Station, unom hangtod napulo ka mga batan-on, lakip ang tulo ka menor de edad, ang nag-inom sa balay ni Maricel Badon sa dihang misugod ang mainitang panaglalis tungod sa pangabugho nga nalambigit sa ilang mga uyab. Misamot ang sitwasyon hangtod miresulta sa away, diin ang biktima misulay og patunga aron pakalmahon ang mga nalambigit.
Gidunggab sa suspek ang biktima gamit ang sanggot sa lubi, nga miigo sa ubos nga bahin sa tuo niyang likod. Human sa insidente, mikalagiw ang suspek ngadto sa wala matino nga direksiyon. Padayon karon ang imbestigasyon sa kapulisan aron masubay ug madakpan ang suspek.
