Gipahimangnoan sa Municipal Traffic and Safety Operations Management o MITSOM sa Local Government Unit sa Ipil ngadto sa publiko kalabot sa mga kasamtangang traffic ordinances sa lungsod, ilabi na sa mga lagda nga direktang may kalabotan sa adlaw-adlaw nga pagbiyahe sa mga motorista ug ubang naggamit sa dalan.
Gipasiugda sa MITSOM nga ang pagpatuman sa mga lagda sa trapiko kinahanglan subay sa kasamtangang mga ordinansa ug hustong proseso. Lakip sa mga gipahinumdoman ang mga butang nga may kalabotan sa pag-inspeksiyon sa mga dokumento sa sakyanan ug drayber, sama sa Driver’s License, Official Receipt o OR, Certificate of Registration o CR, ug uban pang dokumentong gitugot sa balaod. Importante nga masabtan sa publiko ang mga paglapas, katugbang nga silot ug responsibilidad sa mga traffic enforcer aron malikayan ang dili pagsinabtanay.
Giawhag usab ang mga residente ug motorista nga magpakita og disiplina, motahod sa mga lagda sa dalan ug makigtambayayong sa mga otoridad alang sa hapsay ug luwas nga pagbiyahe. Alang sa mga pangutana, kabalaka o kasinatian kalabot sa traffic enforcement, mahimong ipahibalo kini sa MITSOM sa LGU Ipil aron masusi ug matagad sa hustong paagi. Ang tumong mao ang patas nga pagpatuman sa balaod, klarong pagsabot sa mga ordinansa ug kaluwasan sa tanang naggamit sa dalan.
