Narekober ang gidudahang marijuana sa hiniusang operasyon sa Police Station 9 sa General Santos City Police Office ug Women and Children Protection Center–Mindanao Field Unit niadtong nakalabay nga adlaw.
Nakuha ang usa ka pakete nga adunay gidudahang dahon sa marijuana ibabaw sa lamesa atol sa pagpatuman sa mando sa korte alang sa pagsakmit ug pagsusi sa datos sa kompyuter.
Ang gidudahang marijuana gikumpiska gikan sa pagpanag-iya sa usa ka indibidwal nga giila sa alyas nga “Je,” residente sa Purok 27, Yamville 1, Barangay Mabuhay, Gensan. Gibanabanang mitimbang kini og 2.1 gramos ug nagkantidad og 252 pesos.
Itugyan ang nasakmit nga substansiya sa Regional Forensic Unit XII alang sa pagsusi sa laboratoryo aron matino ang matang ug gidaghanon niini.
