Nadakpan ang duha ka indibidwal sa managlahing operasyon batok sa ilegal nga droga sa Banga ug Sto. Niño, South Cotabato, diin nakumpiskar ang gidudahang shabu, niadtong nakalabay nga adlaw.
Dugang niini, duha usab ka wanted person ang nadakpan sa hiniusang operasyon sa kapulisan sa Koronadal City ug Polomolok tungod sa mga kaso nga may kalabotan sa paglapas sa balaod nga nanalipod sa mga menor de edad ug acts of lasciviousness.
Samtang, nakumpiskar ug boluntaryong gitugyan sa kapulisan ang nagkalain-laing sigarilyo nga supak sa kasamtangang regulasyon sa Lake Sebu, Surallah, Tantangan, Tupi, Sto. Niño ug Koronadal City. Gipahamtangan usab og citation tickets ang mga tag-iya sa tindahan nga nakalapas sa balaod ug mga ordinansa.
Sa laing bahin, tulo ka sako sa uling ang narekober sa Tantangan Municipal Police Station atol sa mobile patrol ug gitugyan sa Municipal Environment and Natural Resources Office alang sa hustong pagdumala.
Kabahin kini sa padayong kampanya sa South Cotabato Police Provincial Office batok sa ilegal nga droga, pagpangdakop sa mga wanted person, pagpatuman sa mga regulasyon sa sigarilyo ug pagpanalipod sa kalikupan.
Photo courtesy: SCPPO
