Gipalig-on sa National Commission of Senior Citizens o NCSC Region 12 ug Coca-Cola Europacific Aboitiz Philippines ang paningkamot sa pag-andam sa mga mamumuo alang sa ilang pagretiro pinaagi sa pilot implementation sa “Golden Heart @ Work: A Retirement Transition Program.”
Gipresentar ni NCSC 12 Regional Director Dr. Rochelle Gajete-Oco ang programa atol sa pagpirma sa Collective Bargaining Agreement o CBA tali sa kompanya ug sa General Santos Coca-Cola Free Workers Union niadtong Oktubre 15, 2026, sa General Santos City.
Tumong sa programa nga maandam ang mga mamumuo dili lamang sa pinansyal nga aspeto, kondili lakip usab ang ilang panglawas, emosyonal nga pagpangandam, ug padayon nga pag-apil sa pamilya ug komunidad human sa pagretiro.
Gipasiugda ni Gajete-Oco nga ang pagpangandam sa retirement dili angay kutob lamang sa pension benefits, hinunoa kinahanglan usab nga masiguro ang maayong panglawas, pinansyal nga seguridad, ug malinawon nga pagsugod sa bag-ong yugto sa kinabuhi.
Gipasalig usab sa kompanya ug sa unyon ang ilang suporta sa programa isip kabahin sa pagpalambo sa kaayohan sa mga mamumuo ug ilang mga pamilya.
Gawas niini, gipaila usab sa NCSC 12 ang Expanded Centenarians Act o Republic Act Number 11982, nga naghatag og cash gift sa mga kwalipikadong Pilipino sa ilang pag-abot sa edad nga 80, 85, 90, 95 ug 100 anyos. Gihisgotan usab ang mga kinahanglanon ug proseso sa pag-aplay aron makabenepisyo ang mga kwalipikadong paryente sa mga miyembro sa unyon.
Photo courtesy:NCSC Region 12
