Tanggong sa bilanggoan ang usa ka motorista human misibat sa checkpoint sa Barangay Sinawal, General Santos City, diin narekober gikan kaniya ang usa ka kalibre .45 nga pistola, upat ka bala ug gituohang shabu nga nagkantidad og P47,600 pesos.
Giila ang dinakpan sa alyas “Borj,” usa ka hamtong nga lalaki ug residente sa Barangay Labangal, General Santos City. Sumla sa report sa kapulisan alas 6:30 sa buntag niadtong Oktubre 16, dihang gipara sa mga personahe sa Police Station 2 ang suspek sa checkpoint sa Crossing Litan tungod sa pagdrayb og motorsiklo nga walay helmet.
Apan imbes nga mohunong, mipadagan kini palayo, hinungdan nga gigukod sa mga polis hangtod nadakpan sa Purok Yusaville. Narekober gikan sa iyang bitbit nga bag ang usa ka kalibre .45 nga pistola, usa ka magasin nga adunay upat ka bala, ug duha ka pakete sa gituohang shabu nga motimbang og gibana-banang pito ka gramo.
Giatubang sa suspek ang mga kaso sa pagbatok o pagsupak sa awtoridad, iligal nga pagpanag-iya sa gidudahang droga, ug paglapas sa balaod sa armas ug bala.
Gidala ang suspek sa Dr. Jorge P. Royeca Hospital alang sa medical examination sa wala pa ipadayon ang hustong proseso sa kustodiya sa kapulisan. Sa pagkakaron naka kustudiya na kini sa police station 2 alang sa hustong disposisyon.
Photo courtesy: PRO 12
