Dakpan ang usa ka 34-anyos nga lalaki atol sa buy-bust operation sa Sitio Balwang, Barangay Goleo, Sindangan, Zamboanga del Norte niadtong nakalabay nga adlaw.
Nakumpiskar atol sa operasyon ang lima ka heat-sealed transparent plastic sachet nga adunay sulod nga gidudahang shabu, nga adunay gibana-banang gibug-aton nga mokabat sa 2.5 gramos ug standard drug price nga mobalor sa ₱17,000.
Narekober usab sa mga otoridad ang ₱1,000 nga marked money nga gigamit sa operasyon, usa ka yellow nga disposable lighter ug itom nga sling bag.
Gipangunahan ang operasyon sa Sindangan Municipal Police Station, kauban ang 901st Maneuver Company sa Regional Mobile Force Battalion 9 nga mi-resulta sa malampusong pagkasikop sa suspetsado.
Ang dinakpan gidala gilayon sa Sindangan MPS alang sa tukmang disposisyon. Samtang gipasalig usab sa Zamboanga del Norte Police Provincial Office nga ipadayon ang ilang operasyon batok sa ilegal nga droga isip kabahin sa paningkamot nga mapalig-on ang kaluwasan ug drug free nga kumunidad.
